A única distracción das mozas son os paseos en coche coas súas amistades. O encontro cunha familia xitana durante unha desas excursións suporá un punto de inflexión para Yvette, en quen acordará un desexo até entón descoñecido para ela.

 Publicada postumamente en 1930, A virxe e o xitano foi recibida inmediatamente como unha das obras mestras de Lawrence, capaz de ofrecernos nas súas breves páxinas o brillante relato dun espertar espiritual, intelectual e sexual.

Nado en 1885 na cidade mineira de Eastwood, Inglaterra, nunha familia obreira, David Herbert Lawrence pronto destacou como escritor. Novelista, dramaturgo, ensaísta, poeta, converteuse nun dos autores máis relevantes e polémicos do seu momento.   En 1919, abandona definitivamente o Reino Unido e inicia o que chama a súa «peregrinación salvaxe», residindo temporalmente en diversos lugares do mundo. Falece en 1930, na localidade francesa de Vence, a consecuencia dunha tuberculose.   A súa obra amosa un fondo interese polas relacións humanas en calquera das súas formas, así como polos espazos íntimos dos seus personaxes, os seus desexos, paixóns e o exercicio da liberdade individual fronte ás restriccións sociais. Perseguido pola censura e por certos sectores da crítica en vida e postumamente, un tardío recoñecemento á súa calidade literaria procuroulle unha posición indiscutible entre os grandes nomes da literatura universal.

____

Editorial: Irmás Cartone
Idioma: Gallego